- صباح التاجات

مبدئيا الصورة دي طلعتي علي جوجل و انا بدور علي صورة لتاج ..... فطلعلي الراجل ده اللي شبة ذكر الببغاء .... و شكله عامل دماغ روك ....هههههههههه

- صباح التاجات

- تاج جديد و عرض حبيتين .... من رياح الحنين حنان الشافعي .... ده اسم مركب بس كبير حبتين ... و رغم مكنش ليا مزاج اكتب او ااحل تاجات ( كفاية الاتين اللي فاتوا ... الاول ... الثاني ... ارجوك انقر علي الرقم ...هههههههه) بس يلا كله بثوابه و بيقولك ايه ... اعمل الخير ... وارميه في الزبالة .... طبعا محدش يفهم زبالة صح .... لاني ببساطة حلي ده مش خير خالص .... و انا حليت التاج ده عشان خاطر انه يفش ...... هههههههه.... تفتكروا ايه هو بقي ؟؟ الاجابة تلتزم بها حنان الشافعي بقي .....

- الاسئلة كلها اختيارية و لازم تحلها و الاجابة في ما لا يقل عن 140 سطر للسؤال الواحد :

1- من انت ؟ .... مين انت ياد ؟؟؟

يعني انتي ياعته تاج لواحد متعرفهوش كمان ؟؟؟!!!! ما علينا .... أسمي عادل 23 سنة لسه بتنيل ادرس في التعتيم المصري .... اخرسنة 4 حضارة اوروبية اداب عين شمس .... موجود طول الاسبوع الدور التاني عند قسم حضارة عند عم سعيد بتاع ... المخابرة انده من جمب مكتب الامن و قول ياعادل و انا هنزل السبت .

2 – ما الذي تفعله هنا ؟

وانت مالك ياعم ؟؟؟؟؟ .... كنت معدي من هنا قلت اسلم و اخد الجمعية .... عادي قلت تعمل ايه في الفراغ اللي انت فيه يا واد ياعادل بيه .... قلت اطلع جزء من الامراض النفسية اللي عندي علي البشر و اكتب اي حاجة و الحمدلله ناس كتير اتخدعت فيا .....

3 – أسرائيل تقصف كل جنوب بحثا عنك .... فأي شمال تقصد ؟

أكيد شمال الاطلنطي .... و بعدين لو اسرائيل بتدور عليا يبقي مفيش احسن من اني استخبي عندهم هاروح طبعا شمال تل ابيب .... وبعدين هي ليفني عشان مش بستحمي ... لحقت بلغت اني نصبت عليها في صيغة امها راشيل الهم من بدري ....

4 – انت مكلف بحذف حرف من حروف اللغة العربية أيها ستختار و لماذا ؟

اولا هحذف النحو .... ليه ... مش بحبه ..... و كمان هحذف الحروف التقيلة زي (ض) (ظ) و هدمج ال(ز) و (ذ) لانهم اصلا واحد بس اختلفوا علي النقطة ..... و حرف ال(ع) هيبقي اول حرف في اللغة .... طبعا عشان اسمي .... و هلغي نشيد (مصر التي في خاطري) و هعمم نشيد (القطة المشمشية) علي جميع المراحل التعلمية كجزء من منهج الفيزيا ....

5 – لو قدر لك ان تدخل السجن ماهي القضية التي تتمني ان تدخل بها ؟

هي دي امنية !!! ..... بعيد ا عن اني هدخله ان شاء الله ..... بس اكيد نصب .... لان النصب فن و كمان القتل و السرقة حرام .... و السياسة في السجن وحشة قوي و المساجين بيتظبطوا بشكل غير لائق .... و المخدرات مش بحبها ..... و ممكن سلاح لو افترضنا ان القصافة اللي عندي في البيت سلاح ابيض ....

6 – منذ متي اكتشفت نفسك ؟

ايه ياعم هو انا توت عنخ لمون .... انا مستني اللي يكتشفني .... و انا لسه معرفنيش ... انا مش عارفني انا مش شايفني انا مش سامعني .... بس بحاول اكتشف نفسي في الاجازة دي و انا بعمل اكل ... لان المطبخ بيدي ايحاء للواحد ....

7 – علي مفترق طريق لافتتان اليمني تقول (الي حلمك) والثنية (مالم يحلم به بشر) ايهما تسلك ؟

مين يمني دي ؟؟؟؟ .... وبعديت هتصل باي 140 دليل او خدمة عملاء فودافون او ام نبيل .... بس اعتقد اني حلمي هنفضله لانه احتمال تتطلع اشتغالة و مايتحققش .... هاروح للي ماشفوش بشر واعتقد هيكون ليه علاقة باللي بتعمل في المساجين السياسين .....

8 – نحن لا نعيش حياتنا بل نتعلم فيها كيف نعيش .... ما تعليقك ؟

بسم الله الرحمن الرحيم .... الاجابة تونس .... ياعم ليه الفلسفة دي .... انا مقتنع ان الواحد مابيوصلش لحقيقة الدنيا الا في حالتين يا يتجنن يايموت .... غير كده الحياة بسيطة لدرجة تعقد .... و احنا اصلا مش عارفين نعيش ازاي هيجلنا دماغ نتعلم اصلا ....

9 – بجملة واحدة اكتب تعريفا للكلمات الاتية (10 درجات) :

الوطن : الوطن يعني مصر و مصر هي امك .... و انا مبحبش اتكلم عن امهات حد .... بس انا الصراحة بحب امك قوي و رفضت اسيبها .

الام : اتسألت قبل كده عنها و قلت اني انا و هي عملين زي توم و جيري بالظبط بس ده مايمنعش ان جيري بيحب توم طبعا واضح جدا شكل بيتنا بيبقي ازاي.... ديزني لاند .

الليل : صباح الدماغ .... سجادة سودة علي بعد ملايين ملايين الاميال و عليها دبان منور .... الله يمسيك بالخير ياتيمون .... هههههههه .... بحب الليل عن النهار لان الناس بتنام و ممكن اعمل اي حاجة و اقعد اجري في الشارع او اتمشي في وسط البلد الساعة 4 الصبح من غير ما الاقي مخلوق .. يخربيت الجمال ..... (يعني الحلاوة مش اي جمال تاني) ....

الحب : شر لابد منه .... و زي التاكسي .... دايما اسودها اكتر من ابيضها ... طبعا ده قبل مايطلع تاكسي العاصمة

امريكا : بحترم الناس الصايعة دي .... 200 سنة و بقيت الاولي في العالم .... مش 7000 سنة و مش عارفين نوصل كأس العالم .... بس سياستهم عليها تحفظات كتير خصوصا بعد ماعرفت حاجات منيلة عنهم .... بس الناس هناك اغبي من الشعب المصري و مغيبين تماما ....

المرأة : الام و الام مدرسة و انا في الجامعة .... الصديقة .... و الصديق وقت الضيق بس دي اول واحدة بتجري في الخناقات .... الحبيبة .... يعني هتشطب علي كل اللي في جيوبك و برضه مش هتقولك واحشتني عشان بتتكسف !!!!!!! مع اني ممكن اكسفها اكتر و ااقوم و اسيبها تحاسب ....ههههههههه

الصمت : ياسلام لو تبقي اللغة السائدة في العالم .... مبحبش اسمع حد غيري و غير اللي اختارهم طبعا بالاضافة لعمرو دياب و منير و مزيكا عمر خيرت و ياسر عبد الرحمن و عمار الشريعي و صوت حنان ماضي و شيرين و نجاة و فيروز و ماجدة الرومي و جوليا بطرس و محمد عدوية و عب حليم و جنات و مي كساب و فيروز كراوية و بلاك تيما و وسط البلد و بيتهوفن و عم بخ و عب مطلب و سيد مكاوي و فايزة احمد و شادية ..... كفاية كده باقي اليوم ياريت هدوء شوية ...

الانترنت : تبوسوا ايديكم عشان خلاكم عرفتوا شخصية مريضة زي و ده اثبات ان الانترنت مش دايما حاجة كويسة ..... ههههههههه

10 – قيس و عنترة و جميل هم اللذين يقولون شعر وليلي و عبلة و بثينة صموت لماذا تغيب المرأة ؟

السؤال كان مكتوب غلط و حنان صححته و من هذا المزنق بنشكرها علي المعلومات .... و ايه صموت دي ... زي البراري و الصموت كده ؟!!!! .... و بعدين واحدة طول النهار راشقة في الخيمة تغسل و تعمل اكل (طبعا مكنش في مسح الا لو هتلمع التراب) .... و الرجالة لو مفيش حرب كل واحد ساحبله معزة و قاعد تحت شجرة و يشد من الجوينت و يشرد للبت في مجتمع اساسا كان ضد المرأة .... اعتقد لو كان في حد خلا اي واحدة منهم تشرب سيجارة عرفي (ملغمة يعني) اعتقد كنا دلوقتي هندرس شعر عبلة العامرية في وصف حبيها قيس ....

(معلقة ليلي العامرية في وصف قيس و السيجارة المحشية ) :

اي قيس حبيبي المُز .... يا ارجل من دكر الوز

عيناك اصفي من بركة سبع .... و ذراعاك ولا حديد عز

قبل السيجارة رأيتك حملا ... و الان اراك بغلا

تبا لي ان سكرت من سيجارة محشية حشيشا و تبغا

وانا التي لم اسكر ابدا حتي لو شربت من الحشيش جبلا

11 – ان تكون مطلوبا في جريمة خيرلك من الا تكون مطلوبا مطلقا ... هل تتفق مع هذه العبارة ؟علل ؟

انا حاسس ان اللي عمل التاج ده رد سجون !!!! .... لا ياعم انا انا احب اكون زي ما انا ... و بعدين لما اطلب في جريمة و مصر كلها تتكلم عليا ايه الحلو في كده و بعدين دي بلد اشاعات ... اتمسك تحري يقوللك ده المختل اللي فجر الحسين او ده الماس الكهربي اللي ولع مجلس الشوري .... لا كده كويس .... و بعدين انا معايا ملفاتك ... سامعني ... معايا ملفاتك كلها ....

12 – اللي اين تمضي كلمات الحب بعد ان نقولها ؟

بتروح تعمل بيبي .... وانا مالي .... و بعدين مش مهم الكلام ... المهم الاحساس ... مدام اللي قدامك حاسة بيك و عندها حساسية خلاص .... ااقطع علاقتك بيها .... لحسن يكون طاعون و العمر مش بعزقة ....ولا ايه ؟؟

13 – هل تجد علاقة بين قطاع الطريق و المرأة ؟

اكيد كتير .... بس مبدئيا ان ضد اننا نظلم قطاع الطريق .... الاتنين بيشتركوا انهم بيقلبوك في كل اللي في جيوبك مع العلم ان قاطع الطريق ساعات يبقي ملثم .... الست لا .... قاطع الطريق عنده سبب حتي لو هيشتري بفلوسك مخدرات .... الست بتقلبك عشان حماتك علمتها كده .... و عشان في صوباع روج ب 500 جنية عاجبها .... و هتجيبه عشان تحطه لما تخرج مش عشان جوزها ... قاطع الطريق صريح بيقولك انا جاي ااقلبك ... الست تقولها انا فلوسي فين ... تقولك والله ما اعرف شوف بتودي فلوسك فين .... شكلك ماشي مع واحدة .... مع انها متأكده ان الراجل اللي بيغلط مش بيكرر غلطه تاني ابدا .... قاطع الطريق بتقبله مرة واحدة بس و بيسرقك مرة واحدة بس ... الست

بتسرقك كل يوم و بتستنزفك ماليا و عقليا و نفسيا لحد ما واحد فيكم يموت الاول و غالبا انت و السبب واضح ياشلل يا هبل يا ضغط يا سكر ياقلب يا سارس يا طاعون .... الست بتموت عشان عمرها خلص مش اكتر .

14 – هذافراق بيني وبينك ... لمن تقولها ؟؟

مش بقولها ولا ناوي مع اي حد مع ان اللي اتعمل فيا يخليني انفض لنص اللي اعرفهم ... عملتها مرة واحدة مع واحد بعد صحوبية اكتر من 10 سنين بس كان ليها اسباب قوية مينفعش التغاضي عنها

15 – كيف هو غدا ؟

وانا مالي ..... الغد انا اللي بصنعه مش حد تاني .... و انا هاعمله ازرق في بينك ... بحب الازرق و البنات بيحبوا البينك ... ههههههه

16 – لمن تمرر التاج ؟

لابو تريكة طبعا ........... هههههههه

انا عارف ان في ناس جاوبت التاج ده اساسا بس مبدئيا هكتب الناس الجداد علي التدوين و بعدين هاكتب الكل (جداد في التدوين بالنسبة لي يعني مش عموما....يعني اعرفهم من قريب) :

شقاوة مراهقة

ميمي

اسماء و احلام في وجدانه

Yoyo

الشعب لابد له من حكومه تشكمه

THE illusionist

احلام جوليا

Hadota

احساس طفلة محبة للرومانسية بس واقعية

فاتيما

عاشقة الأحزان
موني الشريف

Dramaqueen

الســــــــــــت فرويـــــــد

ايوشة

عايش و لكن

همسة

ميرام

soma

Lyssandra

ده بالاضافة للحرس القديم طبعا اللي معظمهم جاوب بس احب ابعت تحية معطرة بماء ال ... :

البت المشمشية

حروف

سمايلي روز

سوووووول

فكرة من الزمن ده

اة و كفي

5 جد

اقاصيص

سوووووووووووو

مواجهات

انجي

كيارا

حاسوبتية

دعاء مواجهات

عاشقة الرومانسية

حنان الشافعي

طبعا انا مرتبتش انا اللي افتكرته كتبته .... و كتبت حنان تاني رخامة مش اكتر .... هههههه و لازم تحليه عشان يفشششششششششششش .....؟؟!!!!