- عن خطاب ابوماما اتحدث (تحديث)+سرقة :(:(

سرقة : السرقات اللي انتشرت للكتابات المدونين مش بس بقيت من ناس عادية
انا الموضوع ده اتاخد و اتنشر باسم المدونة في جريدة العربي الناصري دون الرجوع ليا و كأن المدونات سبيل ولا يجوز سؤال صاحبه ..... و في مقال تناول جزء من النص بس ده مايزعلش قوي(لان بيتكلم عن التدوين و في لينكات مدونات كتير قوي) بس معتقدش جريدة تقبل علي نفسها كده .....حاجة زفت علي الصبح .
==========

تحديث : للمتابعين للسينما ... نزلت بوست عن دكان شحاتة في مدونتي السينمائية

===========

للمرة التانية بكتب بعد توقف ....و هيعقبه توقف شوية عشان الامتحانات بس الصراحة مقدرتش امسك نفسي :):)

- عن خطاب ابوماما اتحدث

- " دا انت طلعت ابن صايعة .... ياولا " اول جملة جت علي بالي بعد ما خلاص الراجل كلامه و انا من هنا بعلن اسفي القليل علي تريقتي السابقة بس متتعشموش خير بمعني ...الحوار و هو شخصيا عليهم تحفظات كتير :

- الراجل ذكي قوي ....قوي ....و لماح و عنده حضور و كاريزما فظيعة و دارس و قاري في تاريخ الدول و حتي الكلام اللي مكتوب له زي ايات القرأن و الانجيل و التوراة .... حافظه نصا و معني و مفيش ورقة قدامه ابن الايه ولا حتي ميكرفون في ودانه ؟؟!!!! ازاي كده ... دا احنا متعودين علي اللي بيفوكوا الخط اصلا ..... الراجل حسيت انه واخد دورة تدريبه في جيل المستقبل اللي هو شباب بجد ... يبني مش يهد ..... بس خلاص ديه الميزة الوحيدة في الحوار .

- كلام الراجل زي اللي قبله و اللي قبله و خد عندك (علي قد ما افتكر بقي ) و ترجمة الحوار الاصليه هتكون بين الاقواس :

1- امريكا و اسرائيل بينهم علاقات عمرها ماتتكسر (الترجمة : اللي هيقرب لاسرائيل هطلع تيييت امه...دول بيياكلونا ياجدعان) .

2-لازم فلسطين تعترف بوجود دولة اسرائيل (مش بمزاجهم اعترفوا بالذوق بدل ما تتلبوا)

3- انا امرت بغلق جوانتامو اخر السنة (اهو نكون فتحنا الثلاثة الجداد عقبال عندكم)

4- احنا هنفتح السكة قدام الطلاب (طعالوا امريكا و نستفاد منكم احنا ....الحلم الامريكي كالعادة)

5- احنا تعبنا كتير بسبب 11 سبتمبر (احنا فجرنا ال3 ابراج عشان الجيش مش لاقي شغل)

6- احنا هنسيب العراق علي 2012 (يا مين يعيش وابقوا قابلوني)

7- لازم نعمل منح زي اللي جابت ابويا امريكا (ربنا يخلي المنح اللي عمليتني رئيس ...بس طبعا مفيش حد فيكم تجيله منحة يفكر يبقي رئيس)

8- احنا مش هنفرض الديمقراطية علي حد (احنا هنفرض الديكتوراية و الاستعمار .....التوسعية من التوسع و الامبريالية من ......)

9- I came in peace (نفس الجملة اللي قالوها الفضائين قبل ما يحتلوا العالم في فيلم mars attack عشان كده مش مريحاني)

10- احنا مش بنوجه اهتمامنا للنفط حاليا ..بندور علي العقول الشابة (احتمال نضرب اليابان او كوريا او حتي الصين )

11- مشكلة ايران النووية هتتحتل (هيحصل فيهم زي العراق ...هيضربوا نووي ...هاضرب هيدروجيني و كيماوي)

12- الدول كلها لازم تستخدم القوة النووية السلمية بس و الاسلحة لا (الا طبعا امريكا ....عشان نعرف نضرب بيه وقت اللزوم)

13- الديمقراطية مش بس انتخابات (حاسس انه بيخبط في حد)

- نرجع تاني للراجل ... الراجل كان هيخلي الدمعة تفر من عيني ..... كان ناقص مزيكا فيلم السادات ولا ناصر 56 واجري عليه و احصنه .... الصايعة فن ... و مش كل واحد ينفع يبقي رئيس ... في رئيس يضحك علي كام مليون لكن واحد يقرطس كام مليار .... ارفعلة العمة الصراحة .... كلامه كويس بس مش عارف ابلعه ... لانه نفس كلام كلينتون .... هما تقريبا بيحفظوا الكلام هو هو ... بس كل واحد و طريقته في الالقاء بقي .

- عاجبني الشعب المصري و تصفيقه في النهاية ... انا خفت حد يطلع و يقول له العلاوة ياريس

- معتقدش ان كلامه ده هيتنفذ و السبب اننا سمعنا نفس الحوارات دي و مش معني انه جالنا هنا يبقي الراجل بيحبنا .... ده بس عندهم تصليحات في البيت الابيض لان المدام بتاعته مش عاجبها الحمام و كان بينقط علي مكتب السي اي ايه اللي في البدروم عندهم .... فقالك ازور الهرم و اتصور جنبه و ااقولي كلمتين و اخلع عشان الحق الغداء .

==============
نرجع بقي للامتحانات .... و يابخت من زار و ....غار :)